ໜ້າ

ສ່ວນຂອງຫົວ ຕັ້ງແຕ່ໜ້າຜາກ ລົງມາເຖິງປາຍຄາງ ເອີ້ນ ໜ້າ, ສ່ວນໜຶ່ງຂອງຮ່າງກາຍ ທີ່ຢູ່ກົງຂ້າມກັບຫຼັງ ເອີ້ນ ທາງໜ້າ, ດ້ານທີ່ຢູ່ກົງຂ້າມກັບຫຼັງ ເອີ້ນ ດ້ານໜ້າ.

ດ້ານໜຶ່ງໆຂອງວັດຖຸແບນໆ ເຊັ່ນ ກະດານ ເອີ້ນ ໜ້າ, ໜ້າກະດານ.

ລະດູ ເຊັ່ນ ລະດູເຮັດນາ ເອີ້ນ ໜ້ານາ, ລະດູທີ່ມີຝົນຕົກ ເອີ້ນ ໜ້າຝົນ, ລະດູທີ່ບໍ່ມີຝົນ ເອີ້ນ ໜ້າແລ້ງ.

ອຸປະກອນ ຫຼື ເຄື່ອງຍິງສັດ ເຮັດດ້ວຍໄມ້, ເຫຼັກ, ທອງ ມີຫຼາຍແນວຄື 1. ໜ້າທະນູ ຫຼື ໜ້າທື້ນ, ມີຄັນຍາວໃສ່ສາຍໃຊ້ລູກເຮັດດ້ວຍໄມ້ ຫຼື ເຫຼັກລູກຍາວ, ເວລາຍິງໃຊ້ລູກພາດໃສ່ຄັນ ເອົາມືຂວາກຳແນບໄວ້ ມືຊ້າຍຈັບສົ້ນລູກດັນໃສ່ສາຍ ແລ້ວດຶງນ້າວມາຈິ່ງວາງອອກໄປ. 2. ໜ້າເກັກຄືມີຄັນໜ້າທີ່ຢູ່ກາງ ເຈາະຮ່ອງເປັນໝ້ອງໄວ້ກາງຄັນ ເປັນບ່ອນວາງລູກໜ້າໃສ່ ຫ້າງສາຍມາເກາະໄວ້ໄກ ເກາະໄກເພື່ອຍິງໃຫ້ລູກອອກໄປ.