ແຄງ

ແມງແນວໜຶ່ງ ຢູ່ຕາມໃບໄມ້ ມີກິ່ນຂິວຄືແມງດາ, ມີຫຼາຍຊະນິດ ທັງໂຕນ້ອຍ ແລະ ໂຕໃຫຍ່ ຂົ້ວກິນເປັນອາຫານໄດ້, ໂຕໃຫຍ່ມີສີເຫຼືອງຄ້າຍສີງົວ ໂຕແປໆ ໃຫຍ່ປະມານທໍ່ເລັບນິ້ວມື ເອົາມາຂົ້ວຕຳປົ່ນກິນແຊບຫຼາຍ ເອີ້ນ ແມງແຄງ.

ຫອຍແນວໜຶ່ງຢູ່ທະເລ ໜ່ວຍໃຫຍ່ປະມານທໍ່ໂປ້ມື ຫຼື ໃຫຍ່ກວ່າໂປ້ມື ໂປ້ຕີນ ກໍມີ ກາບເປັນຕຸ່ມຊາໆ ເອີ້ນ ຫອຍແຄງ.

ເວລາມີຄົນຫຼາຍ ຍ່າງເອົາຂ້າງເຂົ້າ ເພື່ອຫຼີກຄົນ ເອີ້ນ ແຄງ, ສະແຄງ, ຕະແຄງກໍວ່າ, ນອນເອົາຂ້າງແປະສາດ ຫຼື ແປະເສື່ອ ເອີ້ນ ນອນແຄງ.