ແກ້ວ

ສ່ວນໃສໆຂອງໜ່ວຍຕາ ເອີ້ນ ແກ້ວ ຕາ ແລະ ເອີ້ນ ຄົນທີ່ເປັນທີ່ຮັກວ່າ ແກ້ວຕາ ດວງໃຈ.

ຊື່ນົກແນວໜຶ່ງຂົນຂຽວ ສົບດຳກໍມີ ແດງກໍມີ, ສອນໃຫ້ເວົ້າພາສາຄົນໄດ້ ເອີ້ນ ນົກແກ້ວ ນົກແຂກ ກໍວ່າ.

ຊື່ປາແນວໜຶ່ງຕົວນ້ອຍໆ ສີໃສ ໃຫຍ່ຂະ ໜາດປາຊິວ ເອີ້ນ ປາແກ້ວ.

ພະສົງ ແຕ່ລະຢ່າງເອີ້ນ ແກ້ວ ເຊັ່ນ ພຸດທະລັດຕະນັງແກ້ວ ຄື ພະພຸດ, ທໍາມະລັດຕະນັງແກ້ວ ຄື ພະທໍາ, ສັງຄະລັດຕະນັງແກ້ວ ຄືພະສົງ.

ເອົາຫີນມາເຈຍ ລະໄນໃຫ້ເປັນແກ້ວ. ເມື່ອເຈຍລະໄນແລ້ວ ມີລາຄາແພງ. ເອົາໄປເປັນເຄື່ອງປະດັບຕົກແຕ່ງ ກໍຖືກັນວ່າງາມ. ແກ້ວນັ້ນມີຫຼາຍຊະນິດ ຄື: ແກ້ວມະນີ, ແກ້ວໄພທູນ, ແກ້ວມະຫານິນ, ແກ້ວພີລາ, ແກ້ວ ມຸກດາ, ແກ້ວມໍລະກົດ, ແກ້ວວິຊຽນ, ແກ້ວມະນີໂຊດ. ແກ້ວມະນີ ໂຊດ ຖືເປັນແກ້ວຂັ້ນສູງ ຫຼື ແກ້ວນໍ້າໜຶ່ງ.

ຄົນທີ່ມີຄຸນຄ່າແກ່ສັງຄົມ ເອີ້ນ ແກ້ວ ເຊັ່ນ ນາງແກ້ວ, ຂຸນພົນແກ້ວ, ຂຸນຄັງແກ້ວ..

ສັດທີ່ມີຄຸນຄ່າ ແກ່ພະລາຊາມະຫາກະສັດ ໃນສະໄໝບູຮານ ເຊັ່ນ: ຊ້າງ, ມ້າ ເອີ້ນ ຊ້າງແກ້ວ, ມ້າແກ້ວ.