ຮາງ

ໄມ້ ຫຼື ໂລຫະ ທີ່ເຮັດເປັນຮ່ອງຍາວໆສໍາລັບໃສ່ອາຫານລ້ຽງສັດ ເອີ້ນ ຮາງ ເຊັ່ນ ຮາງໝູ ຮາງເປັດ ຮາງໄກ່ ເປັນຕົ້ນ, ຮາງສໍາລັບປູກຜັກເອີ້ນ ຮາງ ເຊັ່ນ ຮາງຜັກບົ່ວ, ຮາງຜັກຊີ, ຮາງຜັກແປ້ນ ເປັນຕົ້ນ.

ໄມ້ ຫຼື ໂລຫະທີ່ເຮັດເປັນຮ່ອງຍາວໆ, ສໍາລັບຮອງນ້ໍາຊາຍຄາ ເອີ້ນ ຮາງລີນ.

ເຂົ້າທີ່ກ່ຽວໃນເວລາທີ່ຍັງບໍ່ທັນສຸກຄັກ ຫຼື ໃກ້ຈະສຸກຄັກ ເອົາມາຂົ້ວໃຫ້ສຸກແລ້ວຈຶ່ງຕໍາ ເອົາໄປໜຶ້ງ ເອີ້ນ ເຂົ້າຮາງ.

ຊື່ເງິນຕາທີ່ໃຊ້ຢູ່ໃນປະເທດລາວແຕ່ສະ ໄໝບູຮານ ເຮັດດ້ວຍເງິນແທ້ ມີນໍ້າຫນັກ 6 ຕໍາລຶງ ກັບ 6 ສະຫຼຶງ ຄືໜັກ 25 ບາດ 50 ສະຕາງ ຫຼື 50 ອັດ ມີຮູບອັກສອນ ຈີນ2 ຕົວ ຕີເປັນຕາໝາຍໄວ້ ຈຶ່ງສັນນິດຖານວ່າ ເງິນຮາງຄົງໄດ້ມາຈາກຈີນ.

ຂອງທີ່ໃຫ້ຕອບແທນຄວາມດີ ຄວາມຊອບ ເອີ້ນ ຮາງວັນ ຢ່າງວ່າ "ສູນີ້ເສຍແຮງລ້ຽງ ຮາງວັນກູແຈກ".