ຕໍ່

ເຮັດໃຫ້ຕິດກັນ ເຊັ່ນ ຕໍ່ກອກຢາ.

ຂໍໃຫ້ຫຼຸດລາຄາໜ້ອຍຖືກລົງ ເອີ້ນ ຕໍ່ລາຄາ.

ເອົາສັດລ້ຽງໄປລໍ້ເອົາສັດປ່າ ເອີ້ນ ຕໍ່ ເຊັ່ນ ຕໍ່ນົກ, ຕໍ່ໄກ່ ເປັນຕົ້ນ.

ສັດທີ່ລ້ຽງໄວ້ ເພື່ອໄປຕໍ່ເອົາສັດປ່າ ເຊັ່ນ ຊ້າງຕໍ່, ໄກ່ຕໍ່, ນົກຕໍ່ ເປັນຕົ້ນ.

ເອີ້ນ ຄໍາທີ່ໃຊ້ຈູງຄໍາອື່ນ ໃຫ້ໄດ້ຄວາມຕໍ່ກັນ ເຊັ່ນ ຄໍາຕໍ່, ຄື ບຸບພະບົດ ແລະ ສັນທານ.

ແມງຈໍາພວກໜຶ່ງ ມີປີກໃຫຍ່ກວ່າເຜິ້ງ ໂຕສີດໍາ ມີສີເຫຼືອງກ່ານບ່ອນແອວ ມີໄລຢູ່ກົ້ນ ຄື ເຜິ້ງ ຕອດປວດຫຼາຍ ເຮັດຮັງຢູ່ ທາງໃນຮັງນັ້ນເປັນຊັ້ນໆ ແລະ ເປັນດາງ. ຕໍ່ມີ 4 ແນວ ຄື: ຕໍ່ຕຸ້ມ: ເຮັດຮັງແຂວນຢູ່ຕາມຕົ້ນໄມ້, ຮັງໃຫຍ່ສີມຸມ ບາງຖິ່ນກໍເອີ້ນ ຕໍ່ຄວາຍ ກໍວ່າ, ຕໍ່ຂຸມ: ເຮັດຮັງເປັນຂຸມຢູ່ໃນພື້ນດິນ, ຕໍ່ໂກນ: ເຮັດຮັງຢູ່ໃນໂກນຕົ້ນໄມ້, ຕໍ່ກະດິງ: ມີຮັງນ້ອຍ ແລະ ແຂວນຢູ່ຕາມງ່າໄມ້. ຕໍ່ ງົວ ກໍເອີ້ນ.