ກົກ

ຕົ້ນໄມ້ ເອີ້ນ ກົກໄມ້ ເຊັ່ນ ກົກມີ້, ກົກມ່ວງ, ກົກພ້າວ, ກົກໝາກ..

ຕົ້ນກົກ ຊື່ພັນຫຍ້າຊະນິດໜຶ່ງ ຄ້າຍໆຕົ້ນຜື. ຕົ້ນກົກ ແລະ ຕົ້ນຜື ໃຊ້ຕໍ່າສາດ, ສາດທີ່ຕ່ຳດ້ວຍຕົ້ນກົກ, ງາມກວ່າຕ່ຳດ້ວຍຜື ເພາະຕົ້ນກົກ ລຳນ້ອຍກວ່າ. ຕົ້ນຜື ມັກເກີດຕາມແຄມບຶງ-ໜອງ.

ເຫງົ້າໂຄນ ເອີ້ນ ກົກ ເຊັ່ນ ເຫງົ້າແຂນ, ເຫງົ້າຂາ, ໂຄນແຂນ, ໂຄນຂາ ເອີ້ນ ກົກແຂນ, ກົກຂາ.

ຜູ້ເປັນຕົ້ນຕະກຸນ ຫຼື ຕົ້ນສະກູນ ເອີ້ນ ລູກກົກ, ກໍ ຫຼື ເຫງົ້າ ກໍວ່າ.

ຕົ້ນເຂົ້າທີ່ດຳກ່ອນໝູ່ເອີ້ນ ເຂົ້າກົກແຮກ.

ຊື່ນົກຊະນິດໜຶ່ງ ຂົນປີກດຳດ່າງ ສົບໃຫຍ່ສີເຫຼືອງ ບິນສຽງດັງແຮງ ເອີ້ນ ນົກກົກ.

ກອດ ຫຼື ອູ້ມໄວ້ກັບອົກ (ກັບເອິກ) ເອີ້ນ ກົກ ເຊັ່ນ ແມ່ກົກລູກ, ບ່າວກົກສາວ, ແມ່ໄກ່ກົກລູກ ກໍວ່າ.

ຊື່ອັກສອນທີ່ມີຕົວ ກ. ສະກົດ ເອີ້ນ ແມ່ກົກ.